هنا الزاهد وحكاية أول وآخر صفعة تلقتها من والدتها

كشفت الفنانة هنا الزاهد عن أول قصة حب مرت بها، وكيف عاقبتها والدتها بقسوة وأمام الجميع، وذلك خلال حلولها ضيفة مع النجمة إسعاد يونس في برنامجها “صاحبة السعادة”.

هنا الزاهد عن أول قصة حب: ماما ضربتني بالقلم

روت هنا الزاهد للنجمة إسعاد يونس عن أول قصة حب مرت بها، حيث قالت: “وأنا في الجامعة كنت بحب واحد قمر وكنت أول مرة أكدب على ماما، وكنت المفروض أروح النادي، بس صاحبتي هند نصحتني نروح كافيه سوا”.
وأكملت هنا: “ماما كلمتني وقالتلي أنتي فين علشان تيجي تاخديني، فقولتلها أنا عند هند في البيت، فخليت الشاب يوصلني لغاية بيت هند، بس خليته يقف بعيد عن البيت ومشيت لغاية بيت هند، بس ماما كانت شايفاني، وأول ماوصلت عندها سألتني كنتي فين فقولتلها كنا عند صاحبتنا”.
وتابعت هنا: “ضربتني بالقلم علشان كدبت عليها، وسألتني كنتي فين ومع مين قولتلها كنت مع أدهم، قالتلي كلميه، كلمته وقالتله مش عيب يا حبيبي تنزلها بعيد، بعد كدا توصلها لغاية عندي فقالها حاضر، ومن وقتها وأنا مش بخبي أي حاجة عن ماما”.
وعن الحب والرومانسية قالت هنا: “انا بحب الحب وأنا رومانسية جداً، الحب اللي بيديني الشغف للحياة، بس أنا ليا طريقة في الحب معينة، يعني أنا مش ملزقة، بس عاملة زي الأطفال في حبي وبتقمص وبغير جداً”.

هنا الزاهد عن تامر حسني: كنت بالنسبه الي عروسة

وخلال الحلقة كشفت هنا الزاهد عن علاقتها بالنجم تامر حسني، وإصراره على مشاركة هنا في الغناء معه.
فقالت هنا: “تامر مش عارفة ليه شايفني أني لازم أغني، وفي فيلم “بحبك” سجلنا سوا أغنية، كل اللي حواليه شايفني أني منفعش، بس هو مقتنع، وفعلاً حاولنا نعمل أغنية بس نشزت، فقالي قومي روحي، بس الفيلم الجديد هنغني أغنية فيه سوا”.
وأكملت هنا: “عندما تعرفت إلى تامر حسني في فيلم “بحبك”، كان لازم أتعامل كفنانة ولكني تعاملت بطبيعتي، وحكيت له على موقف وقولتله تعرف يا تامر أنك كنت حاجة كبيرة اوي بالنسبالي وانا صغيرة، تحديداً في فيلم “عمر وسلمى”.
وتابعت: “أنا كان عندي عروسة باربي قصيت شعرها وعملت لها حواجب تخينة زيك، وسميتها عمر وكنا بنتخانق عليها أنا وفرح أختي وكانت ماما بتفض الخناق بينا كثيراً بسب العروسة دي، فأنت بالنسبالي مش كنت فنان كنت عروسة بلعب بيها”.
واختتمت هنا: “أن في اللوكيشن لما تامر يلاقيني زعلانة أو مضايقة فعلشان يخليني اضحك، يقولي الله يرحم العروسة دلوقتي بتمثل قدامك”.

متابعات