غادة عبد الرازق: أنا ملتزمة دينياً والرجل لا يحب الزوجة الناجحة

في مراجعة قوية لمواقفها السابقة سواء في حياتها الشخصية أو الفن، أكدت الفنانة غادة عبد الرازق تخليها عن فكرة الزواج نهائياً، وقالت إنها لن تعلن مجدداً اعتزالها الفن، ولكنها ستترك القرار للأقدار، وأشارت إلى أنها ملتزمة دينياً ولكنها لن ترتدي الحجاب.

غادة عبد الرازق: شيلت فكرة الجواز من دماغي

غادة عبد الرازق تحدثت باستفاضة عن علاقة الزواج من المشاهير في مصر، وقالت في تصريحات تلفزيونية: عقلية الراجل المصري صعب تتقبل الشخصية القوية زيي، الراجل مبيحبش الست تبقى أقوى أو أنجح منه، واللي قابلته في حياتي العاطفية الراجل اللي بيدوس على كرامة المرأة لأني ناجحة، والأمان في أقرب الناس ليا مش في شريك الحياة، وشيلت فكرة الجواز من دماغي.

غادة عبد الرازق: الزمن الحالي لا يصلح لتعدد الزوجات

وتحدثت غادة عبد الرازق عن فكرة تعدد الزيجات بعدما قدمت عدة أعمال درامية تناقش هذه القضية من بينها المسلسل الشهير “الحاج متولي” وقالت: في الزمن ده خلاص استحالة لأن الزمن اتغير والنفوس اتغيرت مينفعش يتعمل دلوقتي.

وردت غادة عبد الرازق على سؤال عن موقفها إذا علمت بأنها زوجة ثانية قائلة: “لا يمكن يحصل وهو هيخاف يقولي كده استحالة ليس لديه القدرة علي ذلك لأن انا مش هحبه أكتر من نفسي مهو كده مبيحبنيش”.

غادة عبد الرازق: والدي السبب في زواجي من كبار السن

كما تحدثت غادة عبد الرازق عن علاقتها بوالدها الراحل وتأثيرها على قراراتها في الزواج موضحة أنها تزوجت من أشخاص أكبر منها سناً بسبب محاولتها للحصول على حنان والدها بعد رحيله وليس بدافع الحب.

وتابعت غادة عبد الرازق: وفاة والدي وأخويا وأنا في سن صغيرة خلاني ارتبطت بـأشخاص أكبر مني، وبعد والد روتانا ارتبطت مرتين بالأكبر مني في السن جداً.. وكنت بحاول أدور على بابا تاني، والمبرر في إني كنت بتجوز حد أكبر مني بـ 25 سنة إني كنت بدور على بابا مش حب.

وكشفت غادة عبد الرازق تفاصيل وفاة والدها قائلة: أنا كنت دلوعة بابا جداً، وقبل ما بابا يتوفى بـ 3 أيام كان مبسوط، لأنه كان هيبقى وزير وحصله هبوط في الدورة الدموية، وتاني يوم الساعة 7 الصبح عرفنا إن بابا توفى، ومش فاكرة هل اتكسرت أو ضعفت.

غادة عبد الرازق: تراجعت عن اعتزال الفن أكثر من مرة

وعدلت غادة عبد الرازق، موقفها من فكرة اعتزالها الفن، وارتداء الحجاب، وقالت: أنا ملتزمة دينياً، وأعلنت كتير أنني هعتزل، وتراجعت تاني، وعشان كده مش هعلن اعتزالي الفن تاني، حتى لو اخدت القرار.

وتابعت: سأترك قرار اعتزالي يأتي بطريقة ربانية مش بقرار مني، أنا عايزة ربنا يقولي أنتي دلوقتي كفاية لحد كده الحمد لله.

وتابعت غادة عبد الرازق: أنا ملتزمة دينياً الحمد لله ومش من الشخصيات اللي بتلبس حجاب، لكن هو حاجة كويسة وأغلب أهلي محجبين، ومفيش عندنا حاجة اسمها إجبار على الحجاب.

أما عن سبب عدم تقديمها أعمالاً كوميدية من جديد، فعلقت غادة عبد الرازق، قائلةً: بعد ما عملت أعمال تراجيدي أوي ولاقيت رد فعل الجمهور عليها حلو، مفكرتش إني أرجع للكوميدي تاني، وعينيا اتخطفت على تمثيل الدراما.

متابعات