ميرنا نور الدين تروي تفاصيل مشهد مؤلم مع العوضي: ضربني بجد

كشفت الفنانة المصرية ميرنا نور الدين عن تعرضها لإصابة حقيقية في كواليس مسلسل “فهد البطل”، خلال التصوير؛ بسبب إصرار النجم أحمد العوضي على أداء المشاهد بواقعية وبكل صدق.

ميرنا نور الدين: العوضي قال لي لازم تنضربي بجد

في لقائها ببرنامج “الراديو بيضحك” عبر أثير “الراديو 9090″، تحدثت ميرنا عن كواليس غير متوقعة، جمعت بين العنف الفني والمشاعر المتضاربة، لتمنح الجمهور لمحة أقرب إلى واقع الدراما خلف الكاميرا.

وأكدت ميرنا أنها تعرضت لإصابة حقيقية خلال أحد مشاهد الضرب بسبب إصرار بطل العمل، أحمد العوضي على أداء المشهد بشكل واقعي حفاظًا على صدقيته الدرامية.

وروَت ميرنا تفاصيل الموقف قائلة “العوضي قال لي لازم تنضربي بجد علشان تحسي بالمشهد.. هو بيضرب بجد واتعورت غصب عنه لأنه كان لابس خاتم فعوّرني، وكمان إيده عفية، لما بيمسكني من دراعي بيوجعني أكتر من القلم”.

وأضافت “أنا قلت له إني هقول للناس إنك ضربت كل واحد فينا… هو عنده تكنيك في الضرب، بس فعلًا اتعورت في وشي بسبب الخاتم، ولما ضربني بالقلم قال لي لازم أضربك عشان تحسي بالمشهد، وبعد ما خلصنا قلت له: حسيت خلاص”.

وأكملت ميرنا نور الدين “مش أول مرة نشتغل مع بعض أنا وأحمد العوضي ولكن هذه أول مرة نعمل معًا بمساحة كبيرة مع بعض. هو لا ينشغل بنفسه ولكن يركز معنا، عايز كلنا ننجح مش هو بس وبالتالي طول الوقت نتناقش عن المشاهد مع بعض”.

وتابعت “لو في لازمة معينة إحنا أصحاب أنا وهو وكارولين عزمي وعصام السقا وكان ممكن يتريق لو قلت جملة بطريقة معينة يقولي دي مش من “شق التعبان” إعدلي لسانك زي كلمة “بالله” أول أيام التصوير كنت بقولها عادي بطريقة ميرنا مش “كناريا” هو كان يساعدني جدًا والكيمياء بينا حلوة”.

مسلسل “فهد البطل”

عرض مسلسل “فهد البطل” خلال الموسم الرمضاني، وهو من بطولة أحمد العوضي، وميرنا نور الدين، وكارولين عزمي، وعصام السقا، وأحمد عبد العزيز، وصفوة، وصفاء الطوخي، وعايدة رياض، ولوسي، ومحمود البزاوي، وحجاج عبد العظيم، وحمزة العيلي، وعزت زين، وأحمد ماجد، ومحمد مهران، ومحسن منصور، ومجدي بدر. وتدور أحداث العمل في إطار اجتماعي شعبي، حول شخصية “فهد” التي تمر بتحولات حادة وسط صراعات مشتعلة بالحب والانتقام.

متابعات