رحمة محسن تكشف صعوبات مشوارها بسبب أشخاص يحيطون بها

نشرت الفنانة رحمة محسن على حسابها الخاص بـ”إنستغرام” مجموعة صور لها من تكريمها بمهرجان “ذا بيست”، وعلّقت عليها بمنشور أثارت به تفاعلًا كبيرًا بين متابعيها، حيث تضمن رسالة مؤثرة تحدثت فيها عن تجاربها الشخصية مع النجاح، والتحديات التي واجهتها بسبب تصرفات بعض الأشخاص من حولها، لتؤكد من خلالها عن تجاوزها لأزماتها الأخيرة، وأنها تقف على أرض صلبة.

وكتبت رحمة قائلة: “مشاعر كتير جوايا من كترها مش قادرة أعبر.. لكن مهم أوي أتكلم عن شوية دروس مستفادة، إن الإنسان لازم يتقبل إن نجاحه ممكن يكون بياكل ف قلب ناس مريضة.. وإن في أشخاص ممكن ماتنامش الليل لو حسوا إنك ف خير وكرم من ربنا.. وإن في ناس ممكن تبقي معاك وماسكة فيك علشان إنت عندك المصلحه”.

وتابعت: “لكن لو المصلحة دي خلصت منك هما مش هايسيبوك تعيش.. لازم يبذلوا أقصى مجهود ممكن يبذله إنسان لتدمير إنسان تاني.. هنا بقى بيحصل إيه”.

وأضافت: “بتحاوطك أعمالك إللي بتتاجر فيها مع ربنا.. بتسندك مرة ماشاركتش فيها ف النميمة على حد.. ومرة ماظلمتش حد.. ومرة أكرمت حد.. ومرة سامحت حد.. ومرة راضيت محتاج.. ومرة جبرت بخاطر مكسور.. ومرة ماقطعتش رزق حد.. ومرة هونت وطبطبت على حد.. ومرة سندت صاحبك.. ومرة راضيت أمك وأبوك.. ومرة أكرمت أخوك.. كل حاجة حلوة مهما كانت بسيطة بتحاوطك لما يجتمع بني آدمين على ظلمك وأذيتك”.

رحمة محسن: مشواري كان صعب ومتعب

وأكملت: “يمكن إللي بحققه يكون في نظر ناس كتير بسيط ومش مهم.. لكن بالنسبالي أنا كبير جدًا، لإن أنا لوحدي إللي عارفة قد إيه المشوار كان صعب ومتعب وكله شقى، ف أنا بتمنى إن أي حد قابل ناس مؤذية وشريرة ف حياته ياخد مني عبرة، علشان أخطر حاجة ممكن يتعرض لها أي بني آدم إنه يآمن ناس خاينين ويكرم إنسان لئيم”.

واختتمت: “ممتنة جدًا لله إنه دايما يطبطب على قلبي مهما زادت الشدة وكبرت المحنة، وأتمنى يارب إن إللي جاي ف حياتي يكون أطيب وأحن من إللي فات، الحمد لله الحمد لله الحمد لله”.

متابعات